Բորտնիկի հիմնադրամի հետ համագործակցության առաջարկ
Ապրիլի 14-15-ը ՀՀ ԿԳՆ ԳՊԿ նախագահ Ս. Հարությունյանի գլխավորած պատվիրակությունը Մոսկվայում այցելել է «Կուրչատովյան ինստիտուտ» ազգային հետազոտական կենտրոն, որտեղ հանդիպումներ են ունեցել կենտրոնի նախագահ Մ. Վ. Կովալչուկի հետ: Այցի ընթացքում կազմակերպվել է սեմինար- խորհրդակցություն, հնչել են երկկողմ զեկույցներ` երկու երկրների միջև համագործակցության զարգացման, երկուստեք հետաքրքրություն ներկայացնող ծրագրերի իրականացման վերաբերյալ: Քննարկվել են նաև ինովացիոն ծրագրերի համատեղ իրականացման ուղղությամբ համագործակցության հարցերը:
Առաջարկվել է համագործակցել Գիտատեխնիկական ոլորտում փոքր ձեռնարկությունների զարգացմանն օժանդակող հիմնադրամի հետ: Հիմնադրամը, որը ստեղծողի անունով կոչվում է նաև Բորտնիկի հիմնադրամ, ներդրումներ է կատարում հեռանկարային գիտահետազոտական և փորձակոնստրուկտորական աշխատանքների իրականացման, նոր բարձրտեխնոլոգիական փոքր արտադրությունների ստեղծման, ինչպես նաև երիտասարդներին գիտատար ձեռնարկատիրական գործունեության մեջ ակտիվորեն ներգրավելու ուղղություններով: Հիմնադրամը մեծ տեղ է հատկացնում նաև Ռուսաստանի Դաշնությունից դուրս գործող ձեռնարկատերերի հետ կապերի հաստատման հարցերին: