ՀՀ կրթության, գիտության, մշակույթի և սպորտի նախարարություն Բարձրագույն կրթության և գիտության կոմիտե

Հանդիպում «Սկոլկովո» հիմնադրամի ներկայացուցիչների հետ

06.02.2015

Փետրվարի 6-ին ՀՀ ԿԳՆ գիտության պետական կոմիտեում տեղի ունեցավ աշխատանքային  հանդիպում  «Սկոլկովո» հիմնադրամի ներկայացուցիչներ  Ալեքսանդր Օկունևի  (ԱՊՀ անդամ երկրների զարգացման  ինստիտուտների ՌԴ համագործակցության ղեկավար) և Մարինա Ուդաչինայի (Ինովացիաների, ենթակառուցվածքների և ներդրումների ինստիտուտի  տնօրեն)  հետ:   

Բացման խոսքում ՀՀ ԿԳՆ գիտության պետական կոմիտեի նախագահ  Սամվել Հարությունյանը  նշեց, որ այս հանդիպումն առաջին քայլն է կոմիտեի և «Սկոլկովո» հիմնադրամի միջև  ստորագրված համագործակցության ուղղությամբ և համոզմունք հայտնեց, որ այն կլինի  երկարատև և փոխշահավետ, հատկապես Հայաստանի Հանրապետության՝ Եվրասիական Տնտեսական Միությանն անդամակցության պայմաններում:  

Ալեքսանդր Օկունևը ներկայացրեց «Սկոլկովո»  հիմնադրամի գործունեության հիմնական ուղղությունները և այլ երկրների ու գիտական կոլեկտիվների հետ  համագործակցության արդյունքները:   Ներկայացվեցին  նաև  ՀՀ  ԿԳՆ  գիտության պետական կոմիտեի և   մասնավոր հատվածի  համաֆինանսավորման սկզբունքով իրականացված կիրառական արդյունքի ձեռքբերմանն  ուղղված ութ ծրագրերի արդյունքներ: Տեղի ունեցավ շահագրգիռ  քննարկում, նախանշվեցին հետագա  համագործակցության  ուղիները: