Գործնական հանդիպումներ Մոսկվայում
Մոսկվա կատարած կարճատեւ այցի ընթացքում Ս. Հարությունյանը, ԱՊՀ մասնակից երկրների ինովացիոն համագործակցության միջպետական նպատակային ծրագրի մշակման աշխատանքային խմբի նիստին մասնակցելուց բացի, մի շարք գործնական հանդիպումներ է ունեցել:
Ժողովուրդների բարեկամության ռուսական համալսարանի պրոռեկտոր, Համաշխարհային էկոնոմիկայի եւ բիզնեսի ինստիտուտի փոխտնօրեն Ալեքսանդր Ալեքսանդրովիչ Չուրսինը, որպես նորաստեղծ «ԱՊՀ երկրների հումանիտար գիտությունների հիմնադրամի» ներկայացուցիչ, առաջարկել է պայմանագիր ստորագրել հիմնադրամի եւ Գիտության պետական կոմիտեի միջեւ:
Ս. Հարությունյանը հանդիպել է նաեւ «Սոգլասիե» ՓԲԸ փոխնախագահ, Մոսկվայի հայ համայնքի ղեկավարներից Սպարտակ Կոստանյանի հետ: Հանդիպման ընթացքում քննարկվել են Ռուսաստանի հայ գործարարների կողմից գիտության ոլորտում Հայաստանում ներդրումներ կատարելու հնարավորությունները:
Հետաքրքիր հանդիպում է եղել նաեւ Մոսկվայի Լոմոնոսովի անվան համալսարանի տեխնոպարկի տնօրեն Օլեգ Մովսեսյանի հետ: Վերջինս առաջարկել է Հայաստանից եւս թեկնածուներ ներկայացնել իր ղեկավարած կենտրոնի կողմից կազմակերպվող բիզնեսի եւ մենեջմենթի դասընթացներին անվճար մասնակցելու համար:
Տեղեկատվության եւ հասարակայնության հետ կապերի բաժին