Հանդիպում Դուբնայի միջուկային հետազոտությունների միացյալ ինստիտուտի ներկայացուցիչների հետ
Սեպտեմբերի 4-ին ՀՀ ԿԳՆ ԳՊԿ նախագահ Ս. Հարությունյանը հանդիպեց Դուբնայի միջուկային հետազոտությունների միացյալ ինստիտուտի փոխտնօրեն Գրիգորի Տրուբնիկովի և նույն ինստիտուտի Տեսական ֆիզիկայի լաբորատորիայի տնօրեն Վիկտոր Վորոնովի հետ:
Հանդիպման ընթացքում քննարկվեցին հայ գիտնականների և ՄՀՄԻ-ի միջև համագործակցության վերաբերյալ հարցեր: Մասնավորապես, նշվեց, որ համագործակցության շրջանակներն անհրաժեշտ է ընդլայնել՝ ընդգրկելով նաև հետևյալ ուղղությունները. կրթական ծրագրեր, համատեղ կիրառական ծրագրեր, գիտական սարքաշինություն, գիտական փորձաքննություն: Պայմանավորվածություն ձեռք բերվեց Հայաստան-ՄՀՄԻ համակարգող հանձնաժողովի ստեղծման մասին, որում, ՄՀՄԻ-ում Հայաստանի լիազոր ներկայացուցիչ Ս. Հարությունյանից բացի, կընդգրկվեն նաև հայկական գիտական կենտրոնների ղեկավարներ:
Հանդիպման ժամանակ նշվեց, որ մինչ այժմ Միջուկային հետազոտությունների միացյալ ինստիտուտի հետ ակտիվորեն համագործակցել են հիմնականում ԵՊՀ ֆիզիկայի ֆակուլտետը և Երևանի ֆիզիկայի ինստիտուտը, և որոշվեց աշխատանքներ տանել ՄՀՄԻ-ի և ՀՀ ԳԱԱ-ի ինստիտուտների միջև համագործակցության ակտիվացման ուղղությամբ:
Տեղեկատվության և հասարակայնության հետ կապերի բաժին