ՀՀ կրթության, գիտության, մշակույթի և սպորտի նախարարություն Գիտության կոմիտե

Հանդիպում Սննդամթերքի անվտանգության պետական ծառայությունում

05.11.2015

Նոյեմբերի 5-ին ՀՀ գյուղատնտեսության նախարարության սննդամթերքի անվտանգության պետական ծառայության պետ Արմեն Հայրապետյանի հրավերով ՀՀ ԿԳՆ գիտության պետական կոմիտեի նախագահ Ս. Հարությունյանը հանդիպեց ծառայության աշխատակազմի, Հանրապետական անասնաբուժասանիտարական և բուսասանիտարական լաբորատոր ծառայությունների կենտրոնի և Սննդամթերքի անվտանգության ոլորտի ռիսկերի գնահատման և վերլուծության գիտական կենտրոնի ներկայացուցիչների հետ:

Կոմիտեի նախագահը ողջունեց ներկաներին` շեշտելով նման միջգերատեսչական միջոցառումների կարևորությունը երկրի տնտեսության ընդհանուր զարգացման համար: Պարոն Հարությունյանը հատուկ նշեց, որ սննդի անվտանգությունը կյանքի մասին գիտությունների զգալի մասն է կազմում, և կարևորեց այդ ոլորտում գիտական ծրագրերը կյանքի կոչելու հանգամանքը:

Պարոն Հարությունյանը մանրամասն ներկայացրեց գիտության ոլորտում իրավիճակը հետխորհրդային շրջանից մինչ օրերս, անդրադարձավ Գիտության պետական կոմիտեի ստեղծմանն ու ոլորտի բարեփոխումների ուղղությամբ կատարած աշխատանքներին, մասնավորապես՝ օրենսդրական դաշտի կատարելագործմանը, ֆինանսավորման նոր ձևերին, միջազգային համագործակցությանն ու գիտական հանրության համար ընձեռնված նոր հնարավորություններին: Իր ելույթում կոմիտեի նախագահն անդրադարձավ նաև Հայաստանում գիտության գերակա ուղղությունների սահմանմանը, հպարտությամբ խոսեց կոմիտեի ջանքերով ստեղծված տեղեկատվական բազաների և անկախ փորձագիտական համակարգի մասին:

«Սննդի անվտանգության ապահովմանն ուղղված խնդիրները ոչ միայն Հայաստանում, այլև միջազգային կառույցներում սահմանվում են որպես ռեգիոնալ  գերակայություններ, ուստի կոչ եմ անում լինել առավել ակտիվ, համագործակցել Գիտության պետական կոմիտեի հետ, մասնավորապես, մասնակցել կոմիտեի կողմից հայտարարվող գիտական ծրագրերի ֆինանսավորման ներպետական և միջազգային մրցույթներին»,_նշեց պարոն Հարությունյանը:

 

Տեղեկատվության և հասարակայնության հետ կապերի բաժին